طريقة لتنظيف البشرة و العناية بها من المنزل

اولا لبنات غادي نعطيكم الخطوات الاساسية لتنضيف البشرة بالبيت ضروري تبعو الخطوات بالتتابع تنظيف الوجه كوماج وتقشير الخلاايا الميتة البخار الماسك الترطيب ادن نبدا على بركة الله بالنسبة لتنضيف...
téléchargement

اولا لبنات غادي نعطيكم الخطوات الاساسية لتنضيف البشرة بالبيت ضروري تبعو الخطوات بالتتابع
تنظيف الوجه
كوماج وتقشير الخلاايا الميتة
البخار
الماسك
الترطيب
ادن نبدا على بركة الله
بالنسبة لتنضيف الوجه كمرحله اولية كنغسلو لوجه ديالنا بالغاسول اللي كيناسب كل وحده فيكم
او كنعملو حليب فقطن المدور وكنمسحو كامل الوجه
انا شخصيا كنعمل le lait demaquillat وكنعمل تنضيف

ندوزو دابا لمرحلة التقشير او كوماج لبنات اللي عندهم الكوماج اللي موالفين يديروه كنصحهم يديو طبقة رقيقة لكامل الوجه والابتعاد دائما عم محيط العينين ويخليو حتى ينشف وكنزولوه بحركات دائرية
بالنسبة اللي ماعندهاش الكوماج ديري الطبيعي اللي مكنش ماحسن منو اللي هوا
الخرقوم+ فرماجه
او
دانون مسوس+الروز
او
الكمون نحطو عليه ماء دافىء نخليو 5 دقايق حتى نحس بيه ولا عجينة وبحركات دائرية نقشر البشرة
هاد المرحلة ضرورية حيت هي اللي كتساعد البشرة باش تستفاد من التنظيف وكتزول الخلايا الميتة وكتساعد البشرة باش تتجدد الخلايا ديالها من جديد وهاي صورة توضيحية كيف كيكون التقشير

دابا غادي نكونو موجدين واحد الاناء نعمله فيه الماء دافئ نحط فيه هاد البونجات راهم عند مول الماكياج غير ب 10 دراهم شريوهم وخليوهم غير لوجه ديالكم كيكونو فالاول قاصحين غير تحطيهم فالما يترخفو ونمسح الوجه مزيان من بقايا الكوماج

ندوزو دابا لمرحلة البخار
دور ديالها تفتيح المسامات وكتنقيهم من الاعماق ديالهم بالنسبة لبنات اللي عندهم اله البخار راه طريقة ديالها باينة بالنسبة اللي ماعندهم تجيبي شي كاسرونة تعملي فيها الاعشاب(خزامه زعتر اوراق معدنوس او بابونج ) المتوفر عندك وكديري فوطة على راسك وكتعرضي وجهك للبخار مزيان فهاد الاثناء دهني وجهك بكريم مساج الوجه او زيت اللوز بحركات دائرية وانتي تحت البخار لمدة 10 دقايق

من بعد نشفي وجهك بكلينكس و ديري كلنكس على الابهام ديالك والسبابة وبداي كتحيدي فالنقط السوداء غير بشوية وغير بلاتي على الوجه ديالكم البنات لانه كيكون المسمات مفتوحه باش ماديروش سيكاتريس وممكن تشريو هاد الابر راها عند مول المكياج وتزولو بها النقط السوداء

لبنات نصيحة الحبوب بعدو عليهم ماتحديوهمش وماطرطقهومش غير النقط السوداء فقط دابا ساليتو منهم غادي ديرو تونيك باش تسدو المسامات واللي ماعندهاش دير تونيك طبيعي اللي هوا مغلى المعدنوس او مغلى البابونج او ماء الورد وتمسحي بيه وجهك باش يتسدو المسام يكون المغلى بارد ماشي سخون
دابا ندوزو للماسك
هى المرحله المهمه لانجاح التنظيف وللحصول على بشره

نضرة ولامعه ومنوره والاهم بلا تحسس.ونغطى الوجه والرقبه

ونختار ماسك يناسب بشرتنا ليفيدها ويغذيها ويرطبها

ويفتحها.ولاننسى نغطى العينين بقطن

مبلول بشاى بارد للاسترخاء التام او شريحتين خيار

والمسكات الطبيعية راها كثيرة خاص كل وحده على حساب نوعيه البشرة ديالها انا غادي ندكر بعض منها واللي مجرب من طرفي
ماسك الافوكا+ دانون مسوس كيصلاح لجميع انواع البشرة
ماسك بنانة +دانون مسوس حتى هو كيصلاح لجميع انواع البشرة
صفار البيض + لحلبة لبشرة الجافة
الخميرة المعجونة+عسل حر
والقائمة طويلة وكاين بزاف فالمنتدا ديالنا العزيز
الماسك كيبقى 20 دقيقة من بعد بالبونجات كنزولوه وكنديرو قطعه ثلج على وجهنا انا مجهزا مكعبات الثلج بماء الورد كنديرهم فدوك القوالب المربعه اللي كيجيو فتلاجة حتى كيجمدو وكنحتافض بيهم فالمجمد ودائما كنمرر وحده على وجهي سواء من كندير التنضيف او مين كنجي من الحمام
اخير الترطيب كل وحده على حساب كريم ليلي او نهاري اللي كدير او دهني بزيت اللوز او الاركان الا مكنش متوفر الكريم ولا تنسونا من صالح دعائكم راني سخفت ورجلي جمدو وانا كنكتب الموضوع

الفئات
نون النسوة

ذات صلة